Í byrjun sumars lögðu kanadísku hjónin Brett Clibbery, 70 ára, og Sarah Justine Packwood, 54 ára, upp í mikla ævintýraför. Markmið þeirra var að sigla á snekkju yfir Atlantshafið, frá Halifax í Kanada og yfir til Azoreyja sem tilheyra Portúgal. Ætlunin var að halda utan um ævintýrið á Youtube-síðu hjónanna, Theros Adventures, og vekja þar athygli á umhverfsivænum samgöngum en snekkja hjónanna var eingöngu knúinn rafmagni sem fékkst með því að nýta vind- og sólarorku.
Hjónin komust hins vegar aldrei á leiðarenda. Viku eftir að þau héldu af stað í ferðalagið var tilkynnt um að samband hefði rofnað við þau og lýst væri eftir þeim. Ekkert spurðist til hjónanna fyrr en að björgunarbátur með líkum tveggja einstaklinga, sem talið er að séu Brett og Sarah, skolaði að landi á eyjunni Sable, sem er 300 kílómetrum suðaustur af Halifax, sex vikum eftir að ferðalagið hófst. Straumar á svæðinu bera hluti yfirleitt að eyjunni og er hún oft kölluð „grafreitur Atlantshafsins“.
Ekki liggur fyrir hvað varð til þess að hjónin þyrftu að yfirgefa snekkjuna sína en farartækið er enn ófundið í óravíddum Atlantshafsins.