Fyrrum Bandaríkjaforseti, Barack Obama, hefur snúið baki við sitjandi forseta, Joe Biden. Erlendir miðlar greina frá því að Obama hafi undanfarna daga kallað eftir því að Biden íhugi stöðu sína alvarlega. Möguleikar hans á endurkjöri hafi minnkað stórkostlega og mögulega tími kominn að stíga til hliðar og hleypa nýjum frambjóðanda að borðinu.
Obama hafði áður lýst yfir stuðningi við framboð Biden og þykir þessi viðsnúningur því merki um stöðu demókrata í aðdraganda kosninganna. Biden hefur komið illa út í viðtölum og kappræðum og ekki tekist að kveða vaxandi áhyggjur af heilsufari hans í kút.
Fyrrum forseti fulltrúadeildar bandaríska þingsins, Nancy Pelosi, hefur eins snúið baki við Biden og tilkynnt forsetanum að hann eigi enga möguleika á að sigra Donald Trump í kosningunum í nóvember. Palosi segir að ef Biden heldur framboði sínu til streitu þá muni það bitna á möguleikum demókrata að halda meirihlutanum í fulltrúadeildinni.
Biden hefur ekki látið sér segjast. Hann sagði við Pelosi að hann sé að koma vel út í skoðanakönnunum og metur líkur sínar góðar. Demókratar eru í erfiðri stöðu.