Einhvern tímann í júní 2019 myrti Virginia McCullough, sem er 36 ára, foreldra sína á heimili þeirra í Chelmsford í Essex á Englandi. En það liðu rúmlega fjögur ár þar til það uppgötvaðist að þau væru látin.

Sky News skýrir frá þessu og segir Virginia hafi leynt þessu með því að segja ættingjum að heilsa foreldra hennar væri ekki góð og að þau hefðu farið í ferðalag.

Í yfirheyrslum játaði hún að hafa myrt föður sinn, hinn sjötuga John, með lyfjum sem hafði verið ávísað á hann. Síðan stakk hún móður sína, Lois sem var 71 árs, í bringuna.

Fyrir dómi kom fram að Virginia faldi lík foreldranna í húsi þeirra og bjó sjálf þar næstu árin.

Til að leyna þessu sagði hún ættingjum sínum og læknum að foreldrum hennar liði ekki vel, þau væru í ferðalagi eða í löngu fríi.

Það var ekki fyrr en í september á síðasta ári sem lögreglan hóf að rannsaka hvarf hjónanna en það gerðist í kjölfar þess að heimilislæknir þeirra tilkynnti að þau hefðu ekki mætt í tíma sem þau áttu pantaða.

Lögreglumenn fóru því heim til hjónanna til að kanna með ástand þeirra. Þegar þeir voru nýkomnir játaði Virginia að hafa myrt þau og lögreglumennirnir fundu líkamsleifar þeirra.

Lydia George, yfirlögregluþjónn, sem stýrði rannsókninni sagði að hún hafi verið mjög flókin. Aðstæður á vettvangi hafi verið mjög erfiðar og vettvangsrannsóknin hafi staðið yfir í marga daga og verið mjög krefjandi. Hún sagði einnig að verknaður Virginia hafi haft mikil tilfinningaleg áhrif á fjölskyldu hennar og hafi lögreglan unnið náið með fjölskyldunni.