Fjórir sjómenn frá Sri Lanka létust og tveir til viðbótar eru í lífshættu eftir að hafa drukkið óþekktan vökva úr flöskum sem þeir fundu á reki á hafi úti.

BBC segir að sjómennirnir hafi verið í veiðiferð þegar þeir fundu flöskurnar um 320 sjómílur frá Tangalla á suðurströnd Sri Lanka.

Talsmaður sjóhersins sagði fréttamönnum að sjómennirnir hafi talið að áfengi væri í flöskunum og hafi því drukkið úr þeim.

Þegar sjóherinn kom að bátnum voru fjórir sjómenn látnir og tveir til viðbótar í lífshættu.

Sjómennirnir höfðu gefið áhöfnum annarra báta á svæðinu flöskur og hófst sjóherinn strax handa við að reyna að hafa uppi á þessum bátum til að geta varað áhafnirnar við.

Enn er verið að rannsaka innihald flasknanna.