Flestir þeirra sem eiga systkin kannast eflaust við að mikil barátta hafi oft átt sér stað í systkinahópnum og eigi sér jafnvel stað löngu eftir að komið er á fullorðinsár.

Oft byrjar þetta hægt og rólega en skyndilega tekur hver hrekkurinn og brandarinn við af öðrum og stundum fer þetta úr böndunum.

En maður einn átti enga von á því að systir hans myndi finna upp á svo svakalegum hrekk sem hún gerði.

Kona, sem kynnti sig sem Cheyenne frá Narre Warren (sem er í Ástralíu), hringdi í hinn vinsæla morgunþátt „Fifi, Fev & Nick“ á útvarpsstöð einni í Melbourne. Saga hennar kom bæði þáttastjórnendum og hlustendum í opna skjöldu.

„Ég borðaði ömmu mína,“ sagði Cheyenne og er óhætt að segja að þáttastjórnendurnir, og væntanlega hlustendur, hafi þá sperrt eyrun.

Hún sagði að amma hennar hefði dáið í ágúst á síðasta ári og hafi lík hennar verið brennt. Til að takast á við sorgina og til að reyna að hressa móður sína við, stakk hún upp á að þær myndu prufa að smakka á ömmu. Það gerðu þær.

En þar með lauk sögunni ekki því hún sagði að þegar bróðir hennar losnaði úr fangelsi og flutti til hennar, hafi hún bætt öskunni út í pastasósu í gríni. Hann borðaði þetta með bestu lyst að hennar sögn enda vissi hann ekki að amma hans væri í sósunni.