Dómstóll í Portland í Oregon í Bandaríkjunum kvað upp þann dóm á mánudaginn að Johnson & Johnson skuli greiða konu einni 260 milljónir dollara, sem svara til um 36 milljarða íslenskra króna, í bætur.

Ástæðan er að konan fékk lungnakrabbamein eftir að hafa andað barnapúðri, framleiddu af fyrirtækinu, að sér.

Erik Haas, aðstoðarforstjóri Johnson & Johnson, segir í yfirlýsingu að niðurstaðan gangi gegn niðurstöðum rannsókna sem sýni að talkúm í barnapúðri sé ekki hættulegt efni, það innihaldi ekki asbest og valdi ekki krabbameini. Hann segir einnig að fyrirtækið muni áfrýja dómnum.

Konan, Kyung Lee, er 48 ára. Hún greindist með lungnakrabbamein á síðasta ári. Hún segist hafa andað efnum úr barnapúðrinu að sér í 30 ár. Fyrst þegar móðir hennar notaði það á hana þegar hún var kornabarn og síðar notaði hún svitalyktareyða, sem innihalda talkúm, frá fyrirtækinu.

Mörg þúsund Bandaríkjamenn hafa höfðað mál gegn fyrirtækinu því þeir telja að þeir hafi fengið krabbamein, þegar þeir komust í snertingu við eiturefni í vörum frá Johnson & Johnson, þegar þeir voru á barnsaldri.

Fyrirtækið vinnur nú að því að ná sátt um að greiða 6,48 milljarða dollara í bætur til flestra þeirra sem hafa höfðað mál á hendur fyrirtækinu en það eru um 61.000 manns. Stærsti hlutinn eru konur sem hafa fengið krabbamein í eggjastokkana.