Danski lyfjarisinn Novo Nordisk hefur höfðað mál á hendur fjölda lyfjaverslana og megrunarstöðva í Bandaríkjunum fyrir að selja lyf sem sagt var innihalda efnið semaglútíð. Semaglútíð er hið virka efni í lyfjum á borð við megrunarlyfin Wegovy og Ozempic.

TV2 segir að samkvæmt upplýsingum frá Novo Nordisk þá hafi verið tilkynnt um 442 tilfelli aukaverkana til bandarískra heilbrigðisyfirvalda af völdum falsks semaglútíðs. 319 af málunum eru skilgreind sem alvarleg. 99 leiddu til innlagnar á sjúkrahús og sjö enduðu með andláti.

Heilbrigðisyfirvöld hafa rannsakað vörurnar sem tengjast þessum málum og segir Novo Nordisk að semaglútíð hafi ekki verið í neinni þeirra. Hins vegar fundust óhreinindi í 24% af þessum fölsuðu megrunarvörum.

Novo Nordisk er eina fyrirtækið sem hefur heimild frá bandarískum yfirvöldum til að selja vörur sem innihalda semaglútíð. Fyrirtækið selur efnið ekki í hreinu formi. Þetta þýðir að ef því er haldið fram að efnið sé að finna í vörum frá öðrum fyrirtækjum en Novo Nordisk, þá er um falsanir að ræða.