Fyrstu kappræðurnar vegna forsetakosninganna í Bandaríkjunum fóru fram í nótt. Þykir Donald Trump þar hafa staðið sig betur og eru demókratar sagðir í krísu eftir að forsetaefni þeirra, Joe Biden Bandaríkjaforseti, kom illa fyrir.
New York Post skrifar í ritstjórnargrein sinni nú í morgun að Bandaríkjamenn hafi í nótt orðið vitni að lokum forsetatíðar Biden. Það sé engin leið fyrir forsetann að ná sér aftur á strik.
„Hljóðin sem þið heyrðuð í gærkvöldi voru fulltrúar demókrata um landið allt að öskra á sjónvarpið sitt. Biden lifir þetta ekki af. Það er pólitísk vanræksla að leyfa honum að halda framboði sínu til streitu. Biden eyddi heilli viku í að undirbúa kappræðurnar og þetta var hans besta frammistaða. Það eitt ætti að skjóta öllum skelk í bringu.“
New York Post þykir almennt hafa mikla hægri slagsíðu og hafa gert mikið úr meintum elliglöpum forsetans, sem þó er aðeins nokkrum árum eldri en Trump. Miðillinn segir að forsetinn hafi virkað ringlaður í nótt og átt erfitt með að halda þræði. Það séu ljóst að það sé farið að slá út hjá forsetanum og það yrði hörmulegt fyrir Bandaríkin að leyfa Biden að sitja annað kjörtímabil.
„Aðspurður um aldur sinn þá ákvað Biden ekki að verja sig heldur fór þess í stað að rifja upp gömlu góðu daganna sem við höldum að hafi verið um aldamótin 1800. Það er engin furða að Hvíta húsið sé að fela forsetann og halda honum frá fjölmiðlum og opinberum viðburðum. Elíta demókrata er að blekkja Bandaríkjamenn og þessi blekking var afhjúpuð í gærkvöldi.“
AP fréttastofan rekur að það sé óumdeilanleg staðreynd að ef Biden nær endurkjöri þá situr hann í embætti þar til hann er 86 ára gamall. Þar með yrði hann elsti forsetinn í sögu Bandaríkjanna. Það sé ekki um það að deila að Biden hafi átt erfitt í nótt. Hann var hás og átti erfitt með að koma orði á það sem hann vildi sagt hafa. Á einum tíma hafi hann misst þráðinn algjörlega með áberandi hætti.
Trump hafi gripið boltann á lofti og hreinlega sagt að hann hafi ekki hugmynd um hvað Biden væri að reyna að segja.
„Ég held að hann viti það ekki heldur.“
Biden skaut til baka: „Þú ert asni og aumingi,“ sagði forsestinn og bætti síðar við: „Þú ert með siðferði á við flækingskött“.
AP fréttastofan rekur að kappræður snúist í raun ekki um málefnin heldur um það hversu mörgum skotum frambjóðendur koma á mótherja sinn. Þetta sé ekki sanngjarn veruleiki en svona virki stjórnmál í Bandaríkjunum.
Trump hafi ítrekað farið með rangfærslur og hafi fyrstur forsetaframbjóðenda sagt: „Ég hafði ekki samfarir við klámstjörnu,“ og það í beinni útsendingu. Trump fór mikinn um að hann hafi rekið bestu efnahagsstefnu Bandaríkjanna fyrr og síðar. Hann hafi eins sakað Biden ranglega um að ætla að leyfa þungunarrof eftir fæðingu.
Kappræðurnar fóru fram á sjónvarpsstöðinni CNN og fyrstu kannanir sýna að Trump hafði mikla yfirburði, en 67% áhorfenda töldu fyrrverandi forsetann standa sig betur.
„Þessar kappræður voru algjör hörmung fyrir Biden,“ skrifaði fréttamaður CNN, Chris Cilizza, á samfélagsmiðlum. „Hann virkaði eins og forngripur. Hann missti þráðinn ítrekað í svörum sínum. Það var erfitt að skilja hann. Hann átti til að hætta í miðri setningu og vaða úr einu yfir í annað. Það hvarflaði ekki að mér að hann myndi standa sig svona illa. Þetta er galið.“
Varaforsetinn Kamala Harris telur þó gagnrýnina nokkuð ósanngjarna. Biden hafi byrjað illa en svo náð sér á strik eftir því sem á leið.“
Forsetafrúin Jill Biden hrósaði manni sínum á sviði kappræðanna að þeim loknum. „Joe þú stóðst þig svo vel. Þú svaraðir öllum spurningunum og vissir allar staðreyndir.“