Lukas McClish lagði upp í þriggja klukkustunda gönguferð í óbyggðum Kaliforníu að morgni 11. júní síðastliðinn. Það teygðist þó heldur betur á gönguferðinni því hann villtist og og fannst ekki fyrr en eftir 10 daga.

Síðast sást til ferða hans nærri Big Baskin Redwood State Park, sem er um 20 km norðan við Santa Cruz, að morgni 11. júní. Tilkynnt var um hvarf hans 16. júní að sögn lögreglunnar í Santa Cruz. Bárust lögreglunni nokkrar tilkynningar um mann sem hefði hrópað á hjálp.

Lögreglan notaði dróna við leitina að honum. Það var síðan á föstudaginn sem þjóðgarðsverðir fundu hann og gátu með aðstoð slökkviliðsmanna komið honum til byggða.

Sky News segir að McClish hafi ætlað í þriggja klukkustunda gönguferð þegar hann villtist. Hann hafi ekki verið með neitt meðferðis því þetta hafi átt að vera stutt gönguferð. Hann var aðeins með vasaljós og skæri meðferðis.

Hann sagðist hafa gengið eftir gljúfrum og drukkið vatn úr fossum í þeim. Hann sagðist ekki hafa haft áhyggjur á meðan hann var villtur. Fjallaljón hafi elt hann um hríð en það hafi verið allt í lagi því það hafi haldið sig í góðri fjarlægð.