Lögreglan hefur nú þegar handtekið rúmlega 100 manns í tengslum við aðgerðir sínar gegn „sumarglæpum“. Flestir hinna handteknu eru grunaðir um þjófnað að sögn Cronica Balear.
Sumarleyfistímabilið er bara nýhafið á eyjunum en samt sem áður hafa þjófar látið mikið að sér kveða. Margir hafa orðið fyrir barðinu á þeim og allmargir hafa séð á eftir öllum eigum sínum í greipar þjófa.
Þjófarnir eru sagðir vera mjög virkir í gestamóttökum hótela og öðrum svæðum þar sem ferðamenn koma mikið. Ölvaðir ferðamenn eru einnig vinsæl fórnarlömb enda yfirleitt ekki erfiðir viðureignar.
Einkennisklæddir og óeinkennisklæddir lögreglumenn taka þátt í aðgerðunum og munu halda þeim áfram í sumar.