Kaupsýslumaðurinn Prakash Hinduja og eiginkona hans, Kamel Hinduja, voru dæmd í fjögurra og hálfs árs fangelsi. Sonur þeirra, Ajay Hinduja, og eiginkona hans, Namrata Hinduja, voru dæmd í fjögurra ára fangelsi.
Auður fjölskyldunnar er metinn á 37 milljarða punda en það svarar til um 7.500 milljarða íslenskra króna.
Fyrir dómi kom fram að fjölskyldan hafði fyrir vana að ráða starfsfólk beint frá Indlandi til að vinna í glæsihýsi hennar í Sviss. Fjölskyldan er ættuð frá Indlandi.
Fólkið fékk svo mánaðarlaun upp á sem svarar til um 35.000 til 70.000 íslenskra króna. Þess utan fékk það afar sjaldan að yfirgefa glæsihýsið.
Fjölskyldan neitaði sök og sagði málareksturinn eingöngu snúast um tilraunir ákæruvaldsins til að gera út af við „Hinduja-fjölskylduna“.
Fjölskyldumeðlimirnir voru einnig ákærðir fyrir mansal en voru sýknaðir af þeirri ákæru.
Áður en málið var tekið fyrir dóm, hafði fjölskyldan gert sátt við þá þrjá starfsmenn sem sökuðu hana um misnotkun.
En þrátt fyrir sáttina, ákvað ákæruvaldið að fara með málið fyrir dóm og rökstuddi það með að þetta væri svo alvarlegt mál.
Í lokaræðu sinni sagði saksóknarinn í málinu að fjölskyldan hefði notfært sér það valdaójafnvægi sem er á milli valdamikils vinnuveitanda og starfsfólks. Þetta hefði fjölskyldan gert til að spara peninga. „Þau högnuðust á eymd heimsbyggðarinnar,“ sagði saksóknarinn að sögn TV2.
