Ofurkakkalakkar breiðast nú út á Spáni og segir Jorge Galván, forstjóri Asociación Nacional de Empresas de Salud Ambiental, að loftslagsbreytingarnar eigi þarna stærstan hlut að máli. Mirror hefur eftir honum hækkandi hitastig, sérstaklega þegar hitinn fer yfir 28 gráður, skapi fullkomið umhverfi fyrir kakkalakka.
Sá tími sem sumarhiti ríkir á Spáni hefur lengst vegna loftslagsbreytinganna og nær nú allt frá vori og langt fram eftir hausti. Þetta hefur orðið til þess að viðkoma kakkalakkanna er miklu meiri en áður og þess utan eru þeir orðnir ónæmari fyrir venjulegum kemískum efnum sem eru notuð til að eitra fyrir þeim.
Galván sagði að best sé að nota aðrar aðferðir en kemísk efni í baráttunni við kakkalakkana. Bæði lífrænar og líkamlegar, það er að kremja þá til dauða, ef hægt er að koma því við. Hann sagði einnig að staðan sé nú þannig að oft sé ekki hægt annað en nota kemísk efni í baráttunni við þetta hvimleiða meindýr.
Gavlán ráðleggur heimafólki og ferðafólki að þrífa húsnæði sitt vel. Að láta mat ekki standa uppi á borðum eða vera óvarin og loka öllum rifum og götum þar sem kakkalakkar geta skriðið inn. Þetta getur dregið úr líkunum á að verða fyrir barðinu á þessari óværu.
