Slysið átti sér stað þann 18. júní síðastliðinn í líkamsræktarstöð í Pontianak á Indónesíu.
Atvikið náðist á öryggismyndavélar í stöðinni og hafa fjölmiðlar ytra nú birt það. Nokkur hlaupabretti eru fyrir framan glugga á stöðinni og var konan að þurrka á sér andlitið með handklæði þegar henni skrikaði fótur með fyrrgreindum afleiðingum.
Konan, sem var 22 ára að sögn fjölmiðla í Indónesíu, var í ræktinni með kærasta sínum og yngri systur. Hún var flutt alvarlega slösuð á sjúkrahús þar sem hún lést af sárum sínum.
Lögregla er með málið til rannsóknar og hafa athugasemdir verið gerðar við staðsetningu hlaupabrettanna við gluggann. Forsvarsmenn stöðvarinnar hafa beðið aðstandendur hennar afsökunar á slysinu en ekki liggur fyrir hvort einhver verði sóttur til saka.