Íbúar í bænum Limburg an der Lahn í Hesse í Þýskalandi gengu nýlega að kjörborðinu og greiddu atkvæði um hvort setja eigi upp gildrur í bænum til að veiða dúfur. Einnig kvað tillagan á um að þegar dúfurnar verða teknar úr gildrunum verði þær rotaðar og síðan snúnar úr hálslið.

Það er svo sem ekkert leyndarmál að dúfur, sem sumir líkja við rottur háloftanna, eru almennt taldar meindýr og eru meðal þeirra dýra sem fæstum líkar við. Þær eru duglegar við að koma sér fyrir í bæjum og borgum og eru oft ekki vitund hræddar við fólk.

Það eru kannski ekki svo stórt verkefni sem bíður meindýraeyða í Limburg an der Lahn því þar eru aðeins um 700 dúfur að því að talið er.

Atkvæðagreiðslan fór fram 9. júní í kjölfar þess að bæjarstjórnin hafði ákveðið að láta slátra dúfunum. Sú ákvörðun vakti mikla reiði og því var málið sent til atkvæðagreiðslu meðal bæjarbúa. 7.350, rúmlega 53% atkvæðisbærra bæjarbúa, greiddu atkvæði með tillögunni að sögn Der Spiegel.