Daily Mail greinir frá þessu en bráðabirgðaniðurstaða krufningar liggur nú fyrir. Ekki leikur grunur á að eitthvað saknæmt hafi átt sér stað.
Mosley skilaði sér ekki úr gönguferð síðastliðinn miðvikudag og var það eiginkona hans sem tilkynnti um hvarf hans á miðvikudagskvöld. Þrátt fyrir umfangsmikla leit fannst Mosley ekki fyrr en í gærmorgun, um 80 metrum frá veitingastað á eyjunni.
Talið er að Mosley hafi verið búinn að ganga í tvær og hálfa klukkustund þegar hann hneig niður og lést. Mikill hiti var á eyjunni síðastliðinn miðvikudag og bendir margt til þess að Mosley, sem var 67 ára, hafi örmagnast í hitanum og glímt við ofþornun.
Það var yfirmaður veitingahúss á Agia Marina sem fann Mosley látinn fyrir utan girðingu sem liggur að veitingastaðnum. Sagði yfirmaðurinn að starfsfólkið væri miður sín yfir því hvernig fór. Mosley hafi augljóslega verið í vanda staddur skammt frá veitingastaðnum en enginn tekið eftir honum.