Verðið á gulli hefur aldrei verið eins hátt og það er nú. Ástæðan er að kínverski seðlabankinn kaupir gull sem aldrei fyrr og auðvitað spákaupmennska.

Gullforði kínverska seðlabankans jókst í mars og var það sautjánda mánuðinn í röð sem það gerðist.

Markmið seðlabankans með þessum miklu gullkaupum er að styrkja öryggisnetið tengt gjaldeyrisvaraforða landsins og til að gera Kína minna háð bandaríska dollaranum.

Í mars hækkaði gullverðið um 10% og á síðasta hálfa árinu hefur það hækkað um 25%.

Stríðin í Úkraínu og Gaza eiga einnig sinn þátt í verðhækkuninni því margir leita í gull þegar staða heimsmála þykir ótrygg.