Margir garðeigendur berjast harðri baráttu við mosa í garðinum og finnst sumum eflaust sem þetta sé ansi vonlaus barátta. En það eru auðvitað til ýmis ráð um hvernig er best að takast á við mosann.

Flestir kannast eflaust við að það sé best að slá garðinn reglulega, gæta þess að það lofti vel um blettinn og nota áburð.

En mosinn vex hratt og getur á skömmum tíma lagt garðinn undir sig. Ef ekkert er að gert verður sífellt erfiðara að hafa sigur í baráttunni. Ef þú ert mjög óheppin(n) þá getur hann meira að segja valdið skemmdum á trjám og gróðurhúsi.

Jonas Hemmingsson, hjá Bayer Garden, benti lesendum idenyt á fjögur góð ráð í baráttunni við mosa.

Hann segir að gott sé að bera mosaeyði á garðinn. Eftir tvær vikur verði mosinn orðinn dekkri á litinn sem sé merki um að hann hafi gefist upp. Þá sé auðvelt að fjarlægja hann. Það er hægt að byrja á þessu í mars og apríl þrátt fyrir að jarðvegurinn sé blautur og kaldur.

Ef þú vilt ekki nota tilbúin efni á garðinn þá er líka hægt að nota góða hrífu til að fjarlægja efsta lagið. Þá getur loft og sól leikið um garðinn en það er nauðsynlegt ef gras á að geta sprottið. Þegar búið er að nota hrífuna er rétt að strá grasfræjum yfir garðinn.

Ef þig dreymir um þéttvaxið grænt gras þá þarftu að muna að bera áburð á reglulega. Þegar þú hefur fjarlægt það mesta af mosanum skaltu bera á garðinn. Ef þú berð á þrisvar sinnum yfir sumarið fær grasið góða næringu og þannig styrkist það í baráttunni við mosann.

Til að styrkja grasið skaltu slá garðinn reglulega. Mælir Hemmingsson með að slegið sé að minnsta kosti einu sinni í viku yfir hásumarið. Það geri grasið þéttara og sterkara og skili sér í baráttunni við mosann.