Reglulega koma upp mál þar sem sjálfskipaðar tálbeitur beita sér fyrir því að afhjúpa barnaníðinga. Er hér vísað til tilfella þar sem óbreyttir borgarar taka að sér tálbeituaðgerðir, en um slíkar aðgerðir eru gerð ströng skilyrði fyrir í lögum og reglum. Veigamesta skilyrðið er að slíkar aðgerðir eru aðeins á færi þeirra sem fara með lögregluvald. Sjálfskipaðar tálbeitur afla gjarnan sönnunargagna sem eru svo afhent lögreglu en eins og sást í Kompás-málunum þá metur dómari slík gögn ólögmæt, sem getur þá leitt til þess að sakborningar eru sýknaðir.

Tálbeitumál er komið upp í Texas í Bandaríkjunum en það hefur ekki leitt til þess að meintur barnaníðingur hljóti ákæru, heldur hefur tálbeitan, karlmaðurinn James Spencer III, verið ákærður fyrir morð.

Það mun hafa verið í maí á síðasta ári sem Spencer myrti 37-ára karlmann að yfirlögðu ráði. Hann skaut Sean Connery Showers til bana með slíkum hætti að yfirvöld hafa líkt því við aftöku. Við rannsókn kom á daginn að Spencer hafði villt á sér heimildir á netinu þar sem hann þóttist vera ólögráða barn. Reyndi hann í því yfirskyni að freista Showers, sem hann taldi vera barnaníðing, til að koma til fundar við sig gegn loforði um kynferðislega greiða. Þegar Showers kom akandi til fundar við það sem hann taldi vera barn, hitti hann í staðinn Spencer sem skaut hann og flúði svo af vettvangi.

Showers hafði árið 2009 játað á sig vörslur á barnaníðsefni. Var hann í kjölfarið dæmdur í 30 mánaða fangelsi fyrir að vanrækja skyldu sína til að skrá sig á lista yfir kynferðisafbrotamenn í heimabæ sínum.

Spencer hafi ekki afborið tilhugsunina um að barnaníðingur gengi laus í nágrenni hans. Því hafi hann ákveðið að losa sig við ógnina. Saksóknari í málinu segir að hér þurfi fólk að horfa framhjá því hvort hinn látni sé viðkunnanlegur eða ekki. Horfa þurfi á atvik máls og þau séu blákalt að hér var framið morð.

„Til að vera hreinskilinn þá var þetta hrein og bein aftaka. Hann beitti sér gegn tilteknum manni, bókaði með honum fund, vissi hvar maðurinn yrði og notaði þær upplýsingar til að skjóta hann ítrekað og hélt svo bara heim eins og ekkert væri eðlilegra.“

Spencer mun hafa sagt við vitni í málinu að lögreglan væri ekki að standa sig í að verja börnin. Ekki væri nægjanlega tryggt að barnaníðingar afpláni dóma sína og þyrfti Spencer því að taka lögin í eigin hendur.