The Guardian segir að frá því í maí hafi lögregluna í Mumbai grunað að dúfan væri kínverskur njósnari. Er sá grunur reistur á miðanum sem var á fæti hennar. Skrifað hafði verið á hann með táknum sem líktust kínversku ritmáli. Af þeim sökum var gengið út frá því að dúfan væri njósnari.
Allt frá því að dúfan var „handtekin“ var hún geymd á dýraspítala og það var ekki fyrr en indversku dýraverndunarsamtökin PETA blönduðu sér í málið sem hún fékk að fljúga frjáls ferða sinna.
Nú liggur fyrir að dúfan var alsaklaus af öllum áburði um að hún stundaði njósnir á vegum Kínverja. Þetta er keppnisdúfa frá Taívan sem hafði villst. Hún var þjálfuð til að keppa við aðrar dúfur í flugi.
The Guardian segir að þetta sé ekki í fyrsta sinn sem Indverjar hafa „handtekið“ dúfu. Það gerðist einni 2020 þegar dúfa, sem tilheyrði pakistönskum sjómanni, gerðist svo ósvífin að fljúga yfir til Indlands. Rannsókn leiddi í ljós að hún var alsaklaus af öllu nema að vera einfaldlega dúfa.