Eftir rúmlega ár á flótta var ítalski mafíósinn Marco Raduano handtekinn á frönsku eyjunni Korsíku fyrir nokkrum dögum síðan. Hann var á topp tíu lista Evrópulögreglunnar Europol yfir hættulegustu afbrotamenn álfunnar.

Í febrúar á síðasta ári flúði hann úr öryggisfangelsi í Nuoro á Sardiníu með því að binda nokkur lök saman og nota þau til að komast niður eftir fangelsisveggnum. Eiginlega bíómyndaflótti. Þetta gerði hann um hábjartan dag og náðist þetta á upptöku eftirlitsmyndavéla. Flóttinn tók 16 sekúndur í heildina og svo virðist sem fangaverðir hafi ekki veitt honum eftirtekt.

Rauano var að afplána 24 ára dóm fyrir að vera félagi í skipulögðum glæpasamtökum, fíkniefnasmygl, vörslu vopna og önnur afbrot.

CBS News segir að hann hafi verið handtekinn á Korsíku þegar hann var nýsestur til borðs með ungri konu á lúxusveitingastað í bænum Bastia.

Hann virðist hafa látið lítið fyrir sér fara á flóttanum og notað fölsuð persónuskilríki sem og fölsuð skráningarvottorð fyrir stolna bílinn sem hann ók um á.

Rauano, sem er fertugur, er talinn vera einn af höfuðpaurunum í einum af yngstu og ofbeldisfyllstu ítölsku mafíuhópunum, Gargano-klaninu, sem varð til í suðausturhluta landsins.