Það að bora í nefnið er kannski ekki jafn saklaust og það lítur út fyrir að vera og virðist geta ýtt undir líkur á því að þróa með sér sjúkdóm á borð við Alzheimers.

Þetta er meðal þess sem kemur fram í niðurstöðum vísindamanna við Western Sidney University og birtust þær í vísindaritinu Biomolecules á dögunum.

Vísindamennirnir benda á að veirur, bakteríur og sveppagró geti auðveldlega borist inn í mannslíkamann í gegnum nefið. Þessir aðskotahlutir geti stuðlað að bólgum í heila og uppsöfnun prótína sem tengjast Alzheimers-sjúkdómnum.

Ekki er vitað nákvæmlega hvað veldur Alzheimers-sjúkdómnum en vísindamenn vita þó að prótín sem falla út á milli taugafrumna trufla heilastarfsemina.

Þegar veirur eða bakteríur komast inn í líkamann reynir líkaminn óhjákvæmilega að losna við aðskotahlutinn og þá koma oftar en ekki fram bólguviðbrögð. Ef þetta gerist síendurtekið getur það valdið eða stuðlað að sjúkdómum eins og Alzheimers.

Læknisfræðilegt heiti þess að bora í nefið er „rhinotillexomania“ og fyrsta vísindarannsóknin um þetta áhugaverða efni var gerð 1995 þegar bandarískir vísindamenn spurðu 254 fullorðna einstaklinga út í nefbor þeirra. 91 prósent þeirra játuðu að þeir boruðu í nefið og 1,2 prósent þeirra sögðust gera það að minnsta kosti einu sinni á klukkustund hverri.