Dýragarður í Bretlandi stendur frammi fyrir nokkuð sérstöku vandamáli. Hópur páfagauka í garðinum þykir allt of orðljótur og nú á að grípa til ráða sem ætlað er að venja fuglana af þessum ósið.
Lincolnshire dýragarðurinn í norð-austurhluta Englands komst fyrir nokkrum árum í fréttirnar vegna fimm orðljótra páfagauka sem blótuðu stöðugt. Nú hafa þrír aðrir páfagaukar í dýragarðinum tekið upp á þessum sama ósið og starfsmenn dýragarðisins hafa nú upphugsað áhættusama áætlun um hvernig stemma skuli stigu við þessari hegðun.
Þetta kemur fram í umfjöllun tímarits Smithsonian-stofnunarinnar. Til stendur að setja alla átta bölvandi páfagaukana í sama hóp og 92 páfagaukar sem ekki bölva. Vonast er til að bölvandi páfagaukarnir muni læra góða hegðun af hinum.
Páfagaukarnir sem bölva eru allir afrískir gráir páfagaukar. Þeir fimm sem voru fyrri til þess komu fyrst í garðinn árið 2020. Þeir deildu fyrst um sinn rými í garðinum en byrjuðu fljótlega að bölva og virtust hvetja hver annan við þessa iðju. Starfsmenn dýragarðsins brugðu þá á það ráð að aðskilja þá. Það dugði þó ekki.
Gaukarnir þrír sem hafa fylgt í fótspor hinna fimm í bölvinu komu nýlega í garðinn. Í kjölfarið var ákveðið að setja þá og hina fimm í stærri hóp í stað þess að einangra þá eins og áður.
Starfsmennirnir segja að gagnstætt því sem margir haldi séu páfagaukar almennt ekki mjög háværir þeir tali nokkuð lágt og þeir vonast að með því að setja gaukana bölvandi í stærri hóp muni ekki heyrast eins vel í þeim.
Um 30 af páfagaukunum í dýragarðinum tala ekki en gefa frá sér hljóð sem ýmist líkjast vörubílum að bakka eða örbylgjuofnum. Vonast er til að páfagaukarnir bölvandi tileinki sér þessi hljóð í stað formælinganna þegar þeir verða settir í stærri hópinn.
Starfsmenn dýragarðsins eru þó meðvitaðir um að þessi áætlun getur mögulega sprungið í andlitið á þeim og að allir 92 páfagaukarnir, sem átta bölvandi páfagaukarnir verða settir í hóp með, geti endað á því að bölva.
Skilti hafa verið sett upp í dýragarðinum til að vara við bölvandi páfagaukunum. Enginn gest hurefur þó kvartað og þeir munu flestir hafa gaman af uppátækjum páfagaukanna orðljótu.
Bretar eru ekki þekktir fyrir að taka smá bölv nærri sér og því koma viðbrögð gesta dýragarðsins ekki svo mjög á óvart.
Páfagaukarnir lærðu bölvið af manneskjum en algengt er að fólk tali mjög skýrt þegar það er að bölva og því auðvelt fyrir páfagaukana að heyra það og herma eftir því.
Þessi tiltekna tegund sem páfagaukarnir bölvandi tilheyra, afrískir gráir páfagaukar, er sögð afar greind og því er hún vinsælt gæludýr. Samkvæmt rannsóknum ráða páfagaukar af þessari tegund við verkefni sem krefjast hugsunar og fimm ára mennsk börn ráða ekki við.
