Sky News segir að Bobi, sem átti heima í Portúgal, hafi að sögn verið 30 ára og 268 daga þegar hann fékk titilinn heimsins elsti hundur hjá Heimsmetabók Guinness en það var í febrúar á síðasta ári.
Heimsmetabókin hóf rannsókn í janúar á aldri Bobi eftir að efasemdir höfðu komið fram um aldur hans. Fæðing hans er þó að sögn skráð í í opinbera skrá portúgalskra yfirvalda yfir gæludýr og hjá landssamtökum dýralækna.
Bobi var hreinræktaður Rafeiro do Alentejo en þetta eru fjárhundar sem verða að meðaltali 12 til 14 ára gamlir.
Þegar Bobi var krýndur heimsins elsti hundur sló hann met ástralsks nautgripahunds sem drapst árið 1939. Hann var þá 29 ára og 5 mánaða.
Fulltrúar Heimsmetabókarinnar segja nú að þeir hafi engar afgerandi sannanir fyrir aldri Bobi. Mark McKinley, forstjóri metaskráningar Heimsmetabókarinnar, sagði í yfirlýsingu að örflögugögn frá hinni opinberu portúgölsku gæludýraskrá hafi verið helsta sönnunin um aldur Bobi. Nú hafi komið í ljós að ekki þurfti að færa sönnur á aldur hunda sem fæddust fyrir 2008.
Bobi bjó alla ævi hjá Leonel Costa og fjölskyldu hans í afskekktu þorpi, Conqueiros, í Portúgal.