Síðan stjórn einræðisherrans Bashar al-Assad í Sýrlandi féll á dögunum og hafa birst í fjölmiðlum fjöldi frásagna þeirra sem máttu þola grimmilegt ofbeldi af hálfu al-Assad fjölskyldunnar á þeim áratugum sem hún var við stjórnvölinn í landinu. Sakirnar voru oftast litlar sem engar en meðal þeirra sem varð fyrir barðinu á fjölskyldunni og mátti þola miklar þjáningar er maður sem gerði ekkert annað en að standa sig betur en einn meðlimur fjölskyldunnar í keppni í hestaíþróttum.

Sky News ræddi við Adnan Kassar sem var á sínum tíma einn af bestu hestaíþróttamönnum Sýrlands.

Hann vann til fjölda verðlauna á níunda og tíunda áratug síðustu aldar. Ferill hans náði hæstum hæðum þegar hann leiddi með góðri frammistöðu sýrlenska liðið til sigurs á alþjóðlegu meistaramóti á heimavelli í borginni Latakia, árið 1993.

Meðal annarra keppenda Sýrlendinga á mótinu var Bassel al-Assad. Bassel var eldri bróðir Bashar al-Assad og var ætlað að taka við af föður þeirra, Hafez al-Assad, sem þá var einræðisherra yfir Sýrlandi.

Adnan Kassar segir að hann og Bassel hafi verið góðir vinir en þar sem hann hafi staðið sig töluvert betur í keppninni hafi þessi vinur hans reiðst mjög.

Bassel lést í bílslysi í janúar 1994 og var þá yngri bróðirinn, Bashar, snarlega gerður að arftaka föður þeirra.

Sigurstundin upphafið að martröðinni

Kassar segir að áhorfendur hafi borið hann á herðum sér eftir þennan glæsta sigur en þessi sigurstund hafi reynst vera upphafið á þjáningum hans.

Skömmu eftir keppnina var hann handtekinn á grundvelli óljósra ásakana sem hann segir hafa verið sprottnar af öfund Bassel. Hann var beittur andlegum og líkamlegum pyntingum. Honum var haldið neðanjarðar í hálft ár en síðan fluttur í hið alræmda Sednaya fangelsi. Fangelsið var kallað „sláturhúsið.“ Það var norður af höfuðborginni Damaskus en eftir að Assad-stjórnin féll hertóku uppreisnarmenn fangelsið og nú hafa allir fangar verið látnir lausir en í fangelsinu voru einkum vistaðir pólitískir fangar.

Kassar segir að hann hafi verið pyntaður reglulega næstu árin í fangelsinu. Pyntingarnar hafi versnað til muna eftir að Bassel dó. Fangaverðir hafI kennt honum um dauðsfallið og á dánardægri Bassel á hverju ári hafi hann verið pyntaður sérstaklega grimmilega.

Þess má geta að slysið sem dró Bassel til dauða varð með þeim hætti að hann ók sjálfur bifreið sinni á miklum hraða á vegrið en hann var á leið á flugvöllinn í Damaskus í mikilli þoku.

Þorði ekki að segja neitt

Árið 2007 var Kassar fluttur í annað fangelsi þar sem aðstæður voru jafn slæmar. Hann segir að til að mynda hafi fangaverðir gert gat á eyra hans morgun einn en um kvöldið hafi þeir kjálkabrotið hann.

Í eitt skipti hafi hann verið hýddur í 1000 skipti fyrir að biðja. Sárin hafi verið svo slæm að húðin hafi nánast farið alveg af á sumum stöðum líkamans.

Eftir að borgarastyrjöldin í Sýrlandi hófst 2011 var athygli alþjóðlegra mannréttindasamtaka vakin á máli Adnan Kassar. Honum var loks sleppt úr haldi, eftir mikinn alþjóðlegan þrýsting, árið 2014, eftir 21 árs langa vítisvist. Assad stjórnin var hins vegar enn við völd en réð reyndar ekki yfir öllu landsvæði Sýrlands. Kassar hefur því ekki tjáð sig opinberlega fyrr en nú um það sem hann þurfti að ganga í gegnum fyrir það eitt að standa sig betur í hestaíþróttakeppni en Bassel al-Assad. Hann segist ekki hafa þorað því en fyrr en nú eftir fall Assad-stjórnarinnar vegna ótta við að vera fangelsaður aftur.

Hann er að vonum mjög ánægður með að stjórninni hafi verið steypt af stóli.