Nú er tími jólaljósa og hátíðarskreytinga og það var akkúrat það sem bæjaryfirvöld hugsuðu með jólaskreytingar á aðalgötunni í kaupstaðnum Fleet í Hampshire á Englandi.

Íbúar hafa þó skellihlegið að ljósunum og sagt þau líta út eins og nærföt sem hengd eru upp á þvottasnúru.

„Ef þeim er ekki ætlað að líta út eins og nærbuxur hvernig eiga þau þá að líta út? Ég get eiginlega ekki séð annað en nærbuxur,“ sagði einn íbúi.

„Ég meina já, þau líta út eins og nærföt. Mér er samt alveg sama,“ sagði annar.

Bæjarfulltrúar sáu spaugilegu hliðina á þessu og fögnuðu því að þeir hefðu fært bæjarbúum hátíðlega gleði.

„Þetta var ekki alveg það sem við höfðum í huga. En hvort sem þú sérð nærbuxur, ljósker eða einfaldlega nútímalega lýsingu þá erum við ánægð að heyra götuljósin okkar vekja gleði, samtal og óvæntan húmor í samfélaginu. Markmið okkar hefur alltaf verið að hressa upp á Fleet High Street og skapa velkomið umhverfi. Það er yndislegt að vita að ljósin færa bros á andlit íbúa. Takk fyrir athugasemdir ykkar. Við metum álit ykkar.“