Morðið á Brian Thompson forstjóra UnitedHealthcare, stærsta sjúkratryggingafyrirtækis Bandaríkjanna, hefur vakið heimsathygli. Það hefur ekki vakið síður mikla athygli hversu margir hafa fagnað dauða Thompson og vísað þá til bandaríska sjúkratryggingakerfisins og þá ekki síst hversu algengt það hafi verið að fyrirtæki Thompson neitaði að greiða fyrir nauðsynlega heilbrigðisþjónustu viðskiptavina. Var hann sjálfur sakaður um að bera ábyrgð á þúsundum dauðsfalla. Nú hefur forstjóri móðurfyrirtækis UnitedHealthcare stigið fram og sýnt þessum sjónarmiðum vissan skilning og viðurkennt að bandaríska heilbrigðiskerfið sé gallað og það þurfi að laga það.
Andrew Witty er forstjóri UnitedHealth Group, móðurfyrirtækis UnitedHealthcare, og ritaði grein um þessi mál í New York Times. Í greininni heiðraði hann minningu Thompson en sagði starfsmenn fyrirtækisins hafa mátt sæta hótunum um frekara ofbeldi.
Slíka hegðun segir hann óásættanlega en hann skilji óánægju landsmanna með heilbrigðiskerfið en heilbrigðisþjónusta í Bandaríkjunum er almennt greidd með tryggingum einkafyrirtækja.
Í umfjöllun CBS um grein Witty kemur fram að Bandaríkjamenn hafi aldrei greitt meira fyrir sjúkratryggingar en samt sem áður sé einni af hverjum fimm beiðnum um greiðslur vegna heilbrigðisþjónustu hafnað.
Maður að nafni Luigi Mangione er í haldi grunaður um morðið en hann hafði einmitt glímt við talsverða vanheilsu í kjölfar brimbrettaslyss og þurft á mikilli heilbrigðisþjónustu að halda. Lögreglan í New York, en morðið var framið þar í borg, segir ekkert benda til að Mangione hafi verið viðskiptinavinur UnitedHealthcare. Hann hafi mögulega myrt Thompson vegna stöðu hans sem forstjóri stærsta sjúkratryggingafyrirtækisins.
Andrew Witty skrifar í grein sinni í New York Times að fyrirtækið skilji reiði þjóðarinnar með heilbrigðiskerfið og sé meðvitað um að það virki ekki eins og það eigi að gera:
„Enginn myndi búa til kerfi eins og við erum með,“ skrifar Witty.
Hann segir að í raun hafi enginn aðili markvisst haft kerfið svona heldur sé það eins og bútasaumsteppi sem saumað hafi verið á margra áratuga tímabili.
Witty segir fyrirtæki sitt reiðubúið til samvinnu um að bæta bandarískt heilbrigðiskerfi svo það virki vel fyrir alla borgara landsins. Hann fullyrðir að Thompson hafi lagt sig allan fram í sínu starfi við að bæta kerfið og þjóna öllum viðskiptavinum fyrirtækisins eins vel og hægt var. Thompson hafi aldrei verið ánægður með kerfið og hafi viljað hafa það bæði gagnsærra, mannúðlegra og að fleiri hefðu efni á heilbrigðisþjónustu.
Það sé vilji fyrirtækisins að halda þessu starfi Thompson áfram.
