Suðurkóresk yfirvöld eru nú að rannsaka hvernig stendur á því að villisvín gat komist óáreitt ferða sinna í borginni Yangsan og inn á járnbrautarstöð þar sem það fór á milli hæða.

Þegar svínið kom á Hopo járnbrautarstöðina réðst það á mann og beit hann í hægri handlegginn að sögn JoonAng Daily. Maðurinn hlaut alvarlega áverka en var ekki í lífshættu.

Árásin átti sér stað við salerni á þriðju hæð lestarstöðvarinnar. Að henni lokinni skemmdi svínið glerdyr í afgreiðslunni á fjórðu hæð.  Áður en svínið lagði leið sína á lestarstöðina, sást það við veitingastað í Dong-myeon hverfinu.

Lögreglumenn skutu svínið síðan þremur skotum og dugði það til að gera út af við það. Það reyndist vega um 100 kíló og var um 1,5 metrar á lengd.