Flestir hafa eflaust heyrt um münchausen by proxy heilkennið en það er notað yfir það þegar fullorðnir búa til sjúkdómseinkenni hjá öðrum til að fá sjálfir athygli. Oft eru fórnarlömbin, þau sem eru sögð þjást af einhverjum sjúkdómi, börn og eru þau oft lögð inn á sjúkrahús og verða oft veik.
Málið í Tyrklandi er eiginlega af þessum toga og þó ekki. Það snýst um að fólk, sem tengist heilbrigðiskerfinu, reyndi að mjólka sjúkratryggingar landsins til að hagnast sjálft. Fórnarlömbin voru kornabörn sem voru gerð veikari en þau voru í raun og voru því flutt af ríkisreknum sjúkrahúsum á einkasjúkrahús en sjúkratryggingarnar greiða hærra daggjald á þeim en á ríkisreknu.
Saksóknarar segja að þetta hafi kostað að minnsta kosti 10 kornabörn lífið.
Málið kom upp á sama tíma og milljónir fjölskyldna berjast við að láta enda ná saman. Traust almennings á yfirvöldum hefur beðið mikinn hnekki og vakið upp miklar umræður um heilbrigðiskerfi landsins.
Málið hefur einnig komið illa við Erdogan forseta og flokk hans, AKP, sem stóð fyrir breytingum á heilbrigðiskerfinu á fyrsta áratug aldarinnar og lagði mikla áherslu á að nota ætti einkasjúkrahús í meiri mæli til að stytta biðlista á öðrum sjúkrahúsum.
Margir af hinum grunuðu í málinu tengjast AKP nánum böndum og einn þeirra var áður heilbrigðisráðherra.
Málið er nú fyrir dómi og fólk hefur safnast saman við dómhúsið til að mótmæla og krefjast þess að „barnamorðingjarnir“ verði látnir sæta ábyrgð og að einkasjúkrahúsunum verði lokað. Margir hafa einnig látið í ljós reiði sína í garð ríkisstjórnarinnar.
Það hefur ekki hjálpað ríkisstjórninni að núverandi heilbrigðisráðherra var áður yfirmaður heilbrigðismála í Istanbúl og bar ábyrgð á eftirlitinu með sjúkrahúsum. Það var einmitt í Istanbúl sem hneykslið átti sér stað. Stjórnarandstaðan hefur krafist afsagnar ráðherrans en því hafa hann og Erdogan ekki orðið við.
Á móti hefur verið gripið til harðra aðgerða gegn sjúkrahúsunum. Níu hefur verið lokað og 47 hafa verið ákærðir vegna málsins, þar á meðal læknar, hjúkrunarfræðingar og að minnsta kosti einn sjúkraflutningsmaður.
Er fólkið ákært fyrir að hafa falsað læknaskýrslur til að láta líta út fyrir að börnin væru veikari en þau voru. Var þetta gert til að réttlæta flutning þeirra á einkasjúkrahús. Til að auka tekjurnar voru foreldrar þeirra oft beðnir um að greiða aukagjöld, þar á meðal fyrir lyf sem voru ekki nauðsynleg og voru síðan seld öðrum.
