Samkvæmt fréttum VG og Aftonposten þá var hann með upptökur af báðum nauðgununum í farsíma sínum. Miðlarnir segja einnig að hann hafi reynt að eyða sönnunargögnum áður en lögreglan fyndi þau.
Lögreglan hefur staðfest að í kjölfar handtökunnar hafi hald verið lagt á síma Høiby og hafi þá fundist upptaka í honum sem varð til þess að nauðgun bættist við langan lista sakarefna á hendur honum. Hann var upphaflega handtekinn í síðustu viku vegna gruns um að hann hefði nauðgað ungri konu.
Þegar gæsluvarðhaldskrafan var tekin fyrir hjá dómstól í Osló sagði verjandi Høiby að ekki hefði verið um nauðgun að ræða, samþykki konunnar hafi legið fyrir.
Høiby neitar sök.
VG segir að lögreglan sé með tvær upptökur undir höndum sem sýni þessar meintu nauðganir og að lögregluna gruni að hann hafi reynt að eyða sönnunargögnum úr farsímanum sínum.
Aftonposten segir að honum hafi tekist að eyða einhverjum sönnunargögnum áður en hann var handtekinn.
