Tvær 19 ára ástralskar stúlkur sem eru á bakpokaferðalagi um suðausturhluta Asíu berjast nú fyrir lífi sínu eftir að hafa drukkið kokteila sem innihéldu metanól en ekki etanól.

Metanól er einnig þekkt sem tréspíri eða viðarspíri og geta afleiðingarnar af neyslu þess verið mjög varasamar. Við niðurbrot metanóls í lifrinni myndast svokölluð maurasýra sem getur valdið hættulegri eitrun.

News.com.au greinir frá því að vinkonurnar hafi útskrifast frá Beaumaris-menntaskólanum í Melbourne í fyrra og haldið í einskonar útskriftarferð fyrir skemmstu. Byrjuðu stúlkurnar að finna fyrir einkennum veikinda eftir að hafa farið á bar á gististað í Udon Thani í Taílandi í norðurhluta landsins á föstudag.

Ástralska fjölmiðlakonan Jacqui Felgate segir að annarri stúlkunni hafi verið flogið á sjúkrahús í Bangkok og hefur hún eftir föður stúlkunnar að ástand hennar sé alvarlegt.

Í frétt News.com.au kemur fram að neysla á 25 til 90 millílítrum af metanóli geti verið banvænt. Einkenni eitrunar eru meðal annars kviðverkir, ógleði, uppköst, öndunarerfiðleikar, blinda og flog.