Þegar ferðamenn snúa heim eftir vonandi vel heppnað frí, þá taka þeir oft með sér farsíma fulla af ljósmyndum og minjagripi á borð við segla eða póstkort. En það er einnig hægt að taka ferskt loft í dós með sér heim.

Að minnsta kosti ef maður heimsækir Comovatn á Ítalíu. Þar er nú hægt að kaupa dós af fersku lofti, sem er að sögn tappað á dósirnar við vatnið fræga, og inniheldur hver dós að sögn 400 millílítra af „100% ekta lofti“ frá svæðinu við vatnið. Dósin kostar 9,90 evrur að sögn CNN.

Comovatn nýtur mikilla vinsælda meðal ferðamanna enda er mikil náttúrufegurð þar og svo laðar það suma þangað að þar eiga margar stjörnur hús, til dæmis Geroge Clooney og eiginkona hans Amal. Þá hafa margar kvikmyndir verið teknar upp þar og má þar nefna „Casino Royale“ og „House of Gucci“.

5,6 milljónir ferðamanna lögðu leið sína að vatninu á síðasta ári að sögn ferðamálayfirvalda.