Rjúfa þurfti þingfund í Nýja Sjálandi eftir að þingmenn sem koma úr hópi frumbyggja, Maóríar, stigu stríðs-haka í mótmælaskyni. Tilgangurinn með uppþotinu var að hindra atkvæðagreiðslu um umdeilt frumvarp um 184 ára sáttmála milli Breta og Maóría. Margir maóríar telja frumvarpið grafa undan réttindum frumbyggja, sem eru um 20% af íbúum landsins.

Sáttmálinn var fyrst undirritaður árið 1840 milli bresku krúnunnar og rúmlega 500 ættbálkahöfðingjum maóría. Þessi sáttmáli er enn notaður í dag þegar kemur að því að túlka lög og við stefnumótun. Sumum finnst sáttmálinn grafa undan réttindum þeirra sem ekki eru af ættum frumbyggja. Þar með hafði þingmaður úr flokknum ACT New Zealand lagt fram frumvarp um að sáttmálinn yrði eftirleiðis túlkaður með þrengri hætti en áður.

Þingmaðurinn Hana-Rawhiti Maipi-Clarke fór fyrir haka gjörningnum. Hún byrjaði á því að rífa frumvarpið í tvennt áður en hún hóf stríðssönginn og tóku þá aðrir maóría þingmenn undir sem og áhorfendur í þingsal. Hundruð frumbyggja hafa lagt að stað í níu daga mótmælagöngu sem kallast hikoi. Gangan mun ná til höfuðborgarinnar á þriðjudaginn og þar mun svo fara fram fjölmennur mótmælafundur í kjölfarið.

Haka er athafnadans sem er gjarnan stiginn á samkomum Maóría. Dansinn er oft stiginn til að bjóða gesti velkomna, til að fagna stórum áföngum í lífinu eða við jarðarfarir. Dansinn hefur oft ranglega verið kallaður stríðsdans, en í raun er Haka regnhlífarhugtak yfir marga ólíka dansa Maóría. Einn dansinn ngeri var notaður til að hvetja stríðsmenn til dáða en svo er Manawa wera haka dans sem er stiginn við jarðarfarir eða aðra viðburði þar sem dauðinn kemur við sögu. Stríðs haka, peruperu, var stiginn af stríðsmönnum fyrir bardaga til að ógna óvininum og minna á styrk Maóría.