Chanel, sem er 36 ára, lék í nokkrum þáttum af hinum vinsælu þáttum Gossip Girl á sínum tíma þar sem hún fór með hlutverk Sawyer Bennett. Síðustu ár hefur hún þó haldið sig fjarri sviðsljósinu og reynt fyrir sér sem rithöfundur.
Daily Star hefur eftir aðstandendum hennar að eiginmaður Chanel hafi ekki verið mjög samstarfsfús við rannsókn málsins. Frænka hennar, Danielle-Tori Singh heyrði síðast í henni þann 30. október síðastliðinn og síðan þá hefur ekkert spurst til hennar.
Chanel er búsett með eiginmanni sínum til eins árs í Playa Vista í suðurhluta Kaliforníu. Að sögn Danielle hefur eiginmaður hennar sagt fjölskyldunni að hún vilji ekki finnast og muni hafa samband þegar hún er tilbúin til þess.
Leit á heimili hjónanna leiddi í ljós að hún hafði skilið bílinn sinn og hundinn sinn eftir en síminn hennar og fartölva fundust ekki.
Danielle telur að eitthvað grunsamlegt sé í gangi og segir hún í samtali við ABC7 News að aldrei líði meira en tveir sólarhringar milli þess sem hún heyrir í henni eða móður sinni. Þá sé mjög óvenjulegt að hún hafi skilið hundinn sinn eftir.
Talsmaður lögreglu segir í samtali við KTLA 5 að málið sé komið á borð lögreglu og lögregla hafi svipast um eftir henni.
„Ég hef þá tilfinningu að eitthvað sé ekki eins og það á að vera,“ segir Danielle.
