Donald Trump yngri sendi forseta Úkraínu, Volodymyr Zelenskí eitraða pillu á samfélagsmiðlum um helgina.
Hann deildi myndbandi af föður sínum, Donald Trump, við hlið Zelenskís ásamt textanum: „Sjónarhorn: Þú ert 38 dögum frá því að missa vasapeninginn“
Í reynd skrifaði Trump ekki færsluna sjálfur heldur var það fyrrum varaforsetaefni repúblikana, Sarah Palin, sem birti færsluna fyrst, og Trump yngri deildi henni þaðan.
Það er ekkert leyndarmál að Trump eldri telur að Bandaríkin hafi eytt alltof miklum peningum í að aðstoða Úkraínu. Almennt er talið líklegt að þegar hann tekur við embætti í janúar þá muni ekki líða á löngu áður en Bandaríkin skrúfi fyrir aðstoðina.
Trump lofaði því þó ítrekað í kosningabaráttu sinni að stuðla til friðar milli Úkraínu og Rússlands, og það fljótlega eftir að hann tæki við embætti. Hann vill meina það að Rússland hefði aldrei ráðist inn í Úkraínu hefði Trump verið kjörinn árið 2020. Líklega mun Trump leggja til að Úkraína afsali sér þeim landsvæðum sem Rússland hefur hernumið, þá einkum Krímskaganum, og eins leggja til að Úkraína hætti öllu daðri við Nató og lýsi yfir hlutleysi. Þessi skilyrði eru ekki ýkja ólík þeim sem Rússlandsforseti, Vladimir Pútín, hefur sjálfur lagt til.
Trump virðist ekki bera mikla virðingu fyrir Úkraínuforseta en hann sagði á kosningafundi í september: „Ég held að Zelenskí sé besti sölumaður sögunnar – í hvert sinn sem hann. kemur hingað til lands labbar hann í burtu með 60 milljarða dollara.“
Joe Biden situr áfram sem forseti fram í janúar og er nú talið að hann muni nota þann tíma til að senda eins mikinn til stuðning til Úkraínu og hann mögulega getur til að styrkja stöðu Úkraínu er Trump tekur við völdum.
