Fljótlega eftir að Donald Trump var kjörinn forseti Bandaríkjanna að nýju fór ógnvekjandi bylgja af stað á samfélagsmiðlum. Þar var konum tilkynnt að nú hefðu þær ekki lengur vald yfir eigin líkama heldur væri valdið í höndum karlmanna.

Setningin: „Þinn líkami, mitt val“ fór á flug og gætu margir haldið að þar væru Trumpistar að vísa til umræðunnar um þungunarrof, enda hafa konur barist fyrir þeim réttindum undir slagorðinu: Minn líkami, mitt val. En nei svo var ekki.

Það var nýnastistinn Nicholas J. Fuentes sem kom með þessa setningu og vísaði til þess að nú hefðu karlar fengið völdin yfir konum.

„Hey, við ráðum yfir líkama ykkar. Vitið þið bara hvað? Karlar vinna, aftur. Ok? Karlmenn vinna aftur. Og já við ráðum yfir líkama ykkar. Hæ ég er repúblikana þingmaður ykkar og það er: Þinn líkami, mitt val. Og menn vinna aftur. Kona verður aldrei nokkurn tímann forseti. Aldrei. Þetta er búið spil. Glerþak? Nei þetta er þak sem er búið til úr múrsteinum. Þið getið aldrei brotið það. Heimskulegu andlitin ykkar klessa bara ítrekað á múrsteinaþakið. Við munum halda ykkur undirokuðum að eilífu. Þið munið aldrei stjórna ykkar eigin líkama. Þið verðið aldrei forseti stórveldisins. Aldrei að fara að gerast, elskan. Ykkar líkami, okkar val.“

Aðdáendur Fuentes voru fljótir að koma þessu í dreifingu og mátti finna þar beinar hótanir um kynferðisbrot, þvinguð hjónabönd og þvingaðar þunganir. Gervigreindarmyndir fóru á flug sem sýndu konur, óléttar í eldhúsum.

Kennarar greindu frá því að barnungir drengir væru að garga þessi skilaboð á bekkjarsystur sínar í grunnskólum. Konum var gróflega misboðið og töldu að skáldsagan Saga þernunnar væri að raungerast fyrir framan þær. Margar fóru að tala um að vopnavæðast til að berjast gegn þeim sem haldi að Trump í Hvíta húsinu þýði að það sé nú löglegt að nauðga.

Aðrir bentu á að þarna væru konur að bregðast of harkalega við nettrölli, en Fuentes er ekki hið hefðbundna nettröll. Hann er áhrifavaldur sem nýtur mikilla vinsælda meðal samfélags ungra karlmanna sem telja sig hlunnfarna af konum, eða svokallaðra Incels. Hann nýtur svo mikilla áhrifa meðal öfga hægri manna að honum hefur verið boðið í mat heim til Trump.

Konur og stuðningsmenn þeirra létu þetta þó ekki ganga yfir sig þegjandi og hljóðalaust og hefur Fuentes nú verið „doxxaður“ eins og það er kallað. Það felst í því að persónuupplýsingar hans eru komnar í dreifingu svo fólk geti áreitt hann bæði á netinu og í raunheimum. Það er búið að deila heimilisfangi hans svo dæmi séu tekin.

Meðal annars er búið að skrá heimili hans sem viðkomustað fyrir ferðamenn eða almenningsklósett á kortum Google. Þar hafa konur og fleiri skilið eftir umsagnir og birt mynd af húsinu.

Fuentes hefur reynt að berjast gegn þessu með því að borga Google til gera hús hans ógreinanlegt á 360 gráðu korti sínu. Konur hafa þó bent á að það geri staðsetninguna enn augljósari þar sem um eina afmáða húsið í götu hans er um að ræða. Hann hefur eins skipt um símanúmer.

Fuentes hefur sjálfur lýst sér sem skírlífum að eigin vali, eða volcel, enda hatar hann konur svo mikið að honum finnst samkynhneigt að sænga hjá þeim. Það gagnkynhneigðasta í heimi sé að vera eykynhneigður incel maður.