Í frétt austurríska miðilsins Heute kemur fram að konan hafi starfað sem bakari í bænum Korneuburg síðustu ár.
Allt ætlaði um koll að keyra árið 2022 þegar hún komst að því að kærasti hennar, 42 ára, hefði haldið fram hjá henni með annarri konu í bænum, en svo vildi til að hún var einnig bakari.
Konan er ákærð fyrir að hafa byrlað fyrrverandi kærasta sínum ólyfjan skömmu eftir að hún komst að framhjáhaldinu. Blandaði hún drykk fyrir hann í gleðskap sem innihélt stórhættulega blöndu metanóls og sveppa. Veiktist fyrrverandi kærastinn alvarlega og er hann með afar takmarkaða sjón sem dæmi.
Konan lét ekki þar við sitja heldur gaf hún kærastanum fyrrverandi bollakökur sem innihéldu talsvert magn sterkra verkjalyfja. Eftir að hann sofnaði djúpum svefni skar hún hann á púls og virðist hafa ætlað að sviðsetja sjálfsvíg. Það er skemmst frá því að segja að konunni tókst ekki ætlunarverk sitt.
Eftir að hafa mistekist tvisvar að verða kærastanum fyrrverandi að bana tók hún upp nýja aðferð. Hún fór til lögreglu og kærði hann fyrir svívirðilegt ofbeldi og fékk meira að segja dóttur sína til að styðja við framburð sinn og ljúga í skýrslutöku hjá lögreglu. Kærastinn var handtekinn og var hann í fangelsi í nokkrar vikur áður en lögregla komst að því að allt væri þetta uppspuni frá rótum.
Réttarhöldin yfir konunni hófust í vikunni og á hún margra ára fangelsi yfir höfði sér verði hún fundin sek.
