David Axelrod segir demókrata hafa gleymt því hverjum flokkurinn á að þjóna og þar með fælt frá sér stóran hluta kjósenda – verkalýðinn- sem hafi litla þolinmæli fyrir snobbinu sem hafi tekið völdin í flokknum.
David Axelrod er pólitískur ráðgjafi sem meðal annars var einn helsti heilinn á bak við kosningabaráttu Barack Obama, fyrrum Bandaríkjaforseta.
Hann hefur nú komið fram með athyglisverða kenningu um hvers vegna demókratar töpuðu fyrir Donald Trump.
„Ég hef virkilega áhyggjur af því hvernig demókrataflokkurinn tengir við kjósendur úr verkalýð þessa lands,“ sagði Axelrod í samtali við fréttamanninn Anderson Cooper hjá CNN.
„Eini kjósendahópurinn í þessu kosningum sem demókratar bættu fylgi sitt hjá voru hvítir háskólamenntaðir kjósendur. En meðal verkalýðsins varð mikið fylgistap.“
Demókratar hafi höfðað til tekjuhárra einstaklinga, til menntaðra einstaklinga. Það sé ekki leiðin að sigri, hvað þá fyrir flokk sem vill vera talinn flokkur vinnandi fólks. Axelrod telur demókrata illa haldna af menntasnobbi.
„Þú getur ekki nálgast vinnandi fólk eins og einhver trúboði sem segir: Við erum hingað komin til að hjálpa þér að verða meira eins og við. Það felst ákveðin fyrirlitning í slíku, ómeðvituð fyrirlitning.“
Axelrod tók fram að Joe Biden, Bandaríkjaforseti, hafi gert góða hluti fyrir vinnandi fólk en á sama tíma hafi flokkurinn fengið á sig yfirbragð menntaelítu sem sé fráhrindandi.
„Flokkurinn sjálfur er í meiri mæli orðinn flokkur gáfnaljósa, úthverfafólks, háskólamenntaðra, og það opnar leiðina fyrir það bakslag sem við erum að verða vitni að.“
Þingmaður demókrata, Robert Garcia, hefur viðrað sambærilega skoðun. Hann sagði í samtali við CNN:
„Það er mikil vinna framundan til að tryggja að við séum að ná til fólksins sem demókrataflokkurinn stendur fyrir, þetta er flokkur vinnandi fólks, þetta er flokkur sem styður við innflytjendur, þetta er flokkur sem styður félagslega aðstoð.“
