Karl konungur hefur að sögn svipt Andrés bróður sinn fjárframlagi upp á 1 milljón punda, sem svarar til um 180 milljóna króna. Er konungurinn sagður hafa gefið fjármálastjóra sínum fyrirmæli um að hætta að greiða þetta árlega framlag til Andrésar.

Karl er einnig hættur að greiða fyrir öryggisgæslu Andrésar, sem kostar að minnsta kosti eina milljón punda á ári, og fyrir rekstur 30 herbergja húss Andrésar í Windsor.

„Hertoginn er ekki lengur fjárhagsleg byrði á konungnum,“ hefur Daily Mail eftir heimildarmanni.

Andrés var lengi sagður vera „uppáhaldssonur“ Elísabetar II. Hann hætti að vera í framlínu konungsfjölskyldunnar 2019 eftir hörmulegt viðtal í fréttaþættinum Newsnight þar sem rætt var um samband hans við bandaríska barnaníðinginn Jeffrey Epstein.

Þess utan var Andrés sakaður um að hafa misnotað hina 17 ára Virginia Giuffre kynferðislega í Lundúnum árið 2001. Hún var seld mansali af fyrrgreindum Epstein. Andrés gerði sátt við Giuffre fyrir tveimur árum en í sáttinni fólst að hann viðurkenndi að hún væri fórnarlamb misnotkunar en hann játaði ekki sök og hefur raunar alltaf neitað ásökununum frá Giuffre.