Þegar Jia Xin Teo varð ljóst að hún var barnshafandi ákvað hún að leyna því fyrir öllum. Hún eignaðist stúlku þann 4. mars síðastliðinn eftir að hafa gengið níu mánuði með hana. Teo, sem er 22 ára, setti stúlkuna í morgunkornskassa, setti hann í plastpoka og síðan í ferðatösku.

Sky News segir að lögreglan hafi komist á snoðir um barneignina eftir að Teo leitaði á sjúkrahús þar sem starfsfólk sá að hún bar þess merki að hafa eignast barn nýlega. Hún þvertók fyrir það. Lögreglan fann barnið tveimur dögum eftir fæðingu í húsi við Raglan Strett í Coventry á Englandi en þar býr Teo nú en hún er frá Malasíu en flutti til Coventry til að stunda nám.

Dómstóll í Warwick fann hana seka um morð í síðustu viku og dæmdi hana í ævilangt fangelsi.

Teo neitaði að hafa gerst sek um morð en játaði að hafa óttast viðbrögð fjölskyldu sinnar í Malasíu ef hún eignaðist barn. Hún sagðist einnig hafa haft áhyggjur af að barneignin myndi hafa áhrif á nám hennar í Coventry.

Hún sagðist einnig hafa heyrt raddir sem sögðu henni að drepa barnið.