Ísraelsmenn hafa átt það til að ná þeim sem þeir vilja ná eins og nýleg árás á Hassan Nasrallah, leiðtoga Hasbollah í Líbanon, er til vitnis um.
Ísraelsmönnum hefur hins vegar ekki enn tekist að hafa hendur í hári Yahya Sinwar sem tók við af Haniyeh eftir að hann var drepinn. Sinwar er af mörgum talinn höfuðpaurinn í skipulagningu hryðjuverkaárásarinnar í Ísrael þann 7. október í fyrra þar sem yfir 1.200 óbreyttir borgarar voru myrtir og um 250 gíslar voru voru teknir.
Breska blaðið The Times ræddi um helgina við ísraelskan blaðamann, Ehud Yaari, sem er einn af fáum ísraelskum blaðamönnum sem hafa rætt við Sinwar. Hann segir að ísraelski herinn sé smeykur við að gera árásir á Sinwar af þeirri ástæðu að hann er öllum stundum umkringdur ísraelskum gíslum sem teknir voru föngum fyrir ári síðan.
Yaari, sem er 79 ára, segist hafa átt í samskiptum við Sinwar í gegnum milliliði eftir atburðina í október í fyrra. Hann segir að Ísraelsher hafi haft tækifæri til að drepa Sinwar, rétt eins og þeir náðu Haniyeh, Deif og Nasrallah, en enginn innan ísraelska hersins þori að taka þá áhættu vitandi að allt í kringum hann eru ísraelskir gíslar.
Sinwar fæddist í Khan Yunis og komst ungur til áhrifa. Hann var einn helsti aðstoðarmaður Sheik Ahmed Yassin, stofnanda Hamas sem var drepinn árið 2004, og var yfir Majd-siðferðislögreglu Hamas sem refsaði fólki grimmilega fyrir að stunda til dæmis kynlíf utan hjónabands og fyrir samkynhneigð.
Frá árásinni 7. október hefur lítið sem ekkert sést til Sinwar og er talið að hann haldi sig í neðanjarðargöngum einhvers staðar á Gasa. Í umfjöllun The Times kemur fram að hann hafi sést á myndskeiði sem ísraelski herinn lagði hald á fyrr á þessu ári en í því sást Sinwar á gangi í neðanjarðargöngum með eiginkonu sinni og þremur börnum. Athygli vakti að hann hélt á stórum poka.
Kobi Michael, sem um árabil starfaði fyrir öryggisþjónustu Ísraels, segir í viðtalinu að í þessum poka sé um það bil 25 kíló af dínamíti. „Og það eru ávallt um tuttugu gíslar í kringum hann. Við höfum haft tækifærið til að drepa hann, en ef við gerum það drepum við líka alla gíslana,“ segir hann og tekur undir framburð Yaari.
Árið 1988 var Sinwar handtekinn af Shin Bet, öryggisþjónustu Ísraels, og tekinn til yfirheyrslu og sá fyrrnefndur Kobi Michael um yfirheyrslurnar. Hann þekkir Sinwar því betur en margir og er ómyrkur í máli í garð hans. „Yahya Sinwar mun aldrei gefa sig fram. Hann dreymir um að verða áfram leiðtogi Hamas á Gaza. Hann er núna að hugsa um næsta voðaverk. Þennan mann þarf að drepa.“
