Vísindamenn hafa lengi rökrætt hvort íbúafjöldinn hafi hrunið á sautjándu öld vegna skógareyðingar, ofnýtingar auðlindanna og stríðsátaka. Evrópubúar komu fyrst til eyjunnar um öld síðar.
Nýlega var erfðamengi 15 eyjaskeggja rannsakað og á grunni niðurstöðunnar segja vísindamenn að íbúafjöldinn hafi aldrei hrunið.
Vísindamennirnir fengu heimild fulltrúa samfélags eyjaskeggja til að rannsaka erfðaefni 15 látinna einstaklinga en jarðneskar leifar þeirra eru í safni í Frakklandi. Þangað voru þær fluttar seint á nítjándu öld og snemma á þeirri tuttugustu.
Live Science segir að rannsókn á sýnunum hafi leitt í ljós að eyjaskeggjum hafi fjölgað jafnt og þétt þar til um 1860 en þá gerðu perúskir þrælar árásir á eyjuna og fækkaði eyjaskeggjum þá um þriðjung.
Anna-Sapfo Malaspina, nýdoktor og meðhöfundur rannsóknarinnar, sagði í samtali við Live Science að vísindamennirnir telji að engar sannanir liggi fyrir um erfðafræðilegt hrun meðal eyjaskeggja. Þegar slíkt hrun eigi sér stað, fækki fólki og erfðafræðilegur fjölbreytileiki glatist.
Í rannsókninni er komist að þeirri niðurstöðu að rúmlega 3.000 manns hafi búið á eyjunni en það er svipaður fjöldi og var þar þegar fyrstu Evrópubúarnir komu þangað. Áður hafði verið talið að 15.000 manns hafi þá búið á eyjunni.
Rannsóknin leiddi einnig í ljós að eyjaskeggjar hafa blandast frumbyggjum frá Ameríku. Telja vísindamenn að sú blöndun hafi átt sér stað einhvern tímann frá 1250 til. 1430. Ekki er vitað hvort eyjaskeggjar sigldu til Ameríku eða hvort frumbyggjar þaðan sigldu til Páskaeyju.
