Sam var á ferðinni í Norður-Dakóta í Bandaríkjunum um miðjan september þegar bifreiðin sem hann ók, 2022 árgerðin af Honda Pilot, fór að láta einkennilega. Bifreiðin byrjaði skyndilega að auka hraðann án þess að Sam fengi við neitt ráðið og þegar hann reyndi að bremsa gerðist ekki neitt.
Sam hafði samband við lögregluna enda taldi hann að hans síðasta stund væri að renna upp. „Ég hugsaði með mér: Ég er sennilega að fara að deyja í kvöld,“ sagði hann í viðtali við bandaríska fjölmiðla í vikunni.
Lögreglan hóf eftirför en eðli málsins samkvæmt reyndist það erfitt að stöðva bílinn sem mældist um tíma á tæplega 180 kílómetra hraða.
Góð ráðu voru dýr enda var Sam á vegi sem fór í T eftir nokkra kílómetra og því var ljóst að lögregla þurfti að bregðast strax við ef ekki átti illa að fara. Var brugðið á það ráð að reyna að aka fram fyrir bílinn og bremsa. Var Sam ráðlagt að hika ekki við að aka aftan á lögreglubílinn.
Þetta bar árangur og komst Sam heill á húfi frá þessari skelfilegu lífsreynslu, en um 20 mínútur liðu frá því hann hafði samband við lögregluna þar til bíllinn var stopp.
Ekki liggur fyrir hvað fór úrskeiðis og sögðust forsvarsmenn Honda ekki geta tjáð sig um málið fyrr en búið væri að ljúka rannsókn á ökutækinu.
Sam er nú sestur aftur á skólabekk eftir þessa óhugnanlegu lífsreynslu. Og það er kannski kaldhæðni örlaganna sem ræður því að hann er að læra bifvélavirkjun.
