Ríkasti maður heims, Elon Musk, fæddist í Suður-Afríku árið 1971. Eins og svo marga aðra dreymdi hann um að komast til fyrirheitna landsins Bandaríkjanna og þangað fór hann og er enn. Hann starfaði án atvinnuleyfis þar í landi um hríð á tíunda áratugnum.

The Washington Post skýrir frá þessu og segir að Musk hafi komið til bæjarins Palo Alto í Kaliforníu 1995. Þar ætlaði hann að stunda nám við Stanford háskólann.

Hann skráði sig þó aldrei í þau námskeið, sem hann átti að taka. Þess í stað stofnaði hann frumkvöðlafyrirtækið Zip2 sem sinnti hugbúnaðargerð.

Fyrirtækið var selt 1999 fyrir um 300 milljónir dollara.

Tveir sérfræðingar í bandarísku útlendingalöggjöfinni sögðu í samtali við The Washington Post að ef vinna Musk hjá fyrirtækinu hefði átt að vera lögleg, þá hefði hann þurft að vera í fullu námi samhliða.