Þetta kemur fram í nýrri rannsókn sem hefur verið birt í vísindaritinu Nature. BBC skýrir frá þessu og segir að annar loftsteinn, aðeins minni, hafi skollið á jörðinni á svipuðum tíma. Hann lenti við strönd Vestur-Afríku og myndaði stóran gíg.
Sjávarjarðfræðingurinn Uisdean Nicholson, hjá Heriot-Watt háskólanum í Edinborg, uppgötvaði gíginn fyrir tveimur árum. Þá lá ekki ljóst fyrir hversu stór loftsteinn hafði skollið niður.
Vísindamenn notuðu sérstakar þrívíddarmyndir til að rannsaka gíginn sem er á um 300 metra dýpi.
Í samtali við The Guardian sagði Nicholson að vitað sé um 20 gíga í höfum víða um heim en enginn hafi verið myndaður í jafn miklum smáatriðum og þessi.
Talið er að loftsteinninn hafi skollið á jörðinni fyrir 65 til 67 milljónum árum síðan og hafi þá myndast að minnsta kosti 800 metra há flóðbylgja í Atlantshafinu.
Ekki er ljóst hvort þessi loftsteinn skall á jörðinni á undan eða eftir þeim sem gerði út af við risaeðlurnar.
Gígurinn, sem fjallað er um í rannsókninni, er um 8 km í þvermál. Talið er að loftsteinninnhafi verið um 400 metra breiður og hafi hraði hans verið um 72.400 km/klst þegar hann skall á jörðinni.
Til samanburðar má nefna að gígurinn, sem loftsteinninn sem gerði út af við risaeðlurnar, myndaði er 161 km í þvermál. Hann er á Yucatán-skaganum í Mexíkó.