Eitt nýjasta afbrigði kórónuveirunnar, sem veldur COVID-19, hefur fengið nafnið XEC. Sumir sérfræðingar telja að þetta afbrigði verði hið ráðandi afbrigði í vetur. En er það eitthvað frábrugðið öðrum afbrigðum veirunnar og er það hættulegra?

Dr Jamie Lopez Bernal, farsóttafræðingur hjá UKHSA, sagði í samtali við Sky News út frá fyrirliggjandi upplýsingum um afbrigðið, þá sé engin ástæða til að hafa meiri áhyggjur af því en öðrum afbrigðum en bresk heilbrigðisyfirvöld fylgist samt sem áður náið með því.

XEC er eins og svo mörg önnur afbrigði veirunnar, hluti af Ómíkronfjölskyldunni.

Afbrigðið uppgötvaðist í maí að sögn Alþjóðaheilbrigðismálastofnunarinnar WHO sem segir að afbrigðið sé samsuða KS.1.1 og KP.3.3. Þessi afbrigði  skiptust á erfðafræðiupplýsingum og úr varð þriðja afbrigðið, XEC.

WHO sagði nýlega að XEC væri annað af tveimur afbrigðum sem sótt í sig veðrið á heimsvísu frá miðjum ágúst fram í miðjan september en valdi þó aðeins litlum hluta smita. KP.3.3 olli tæplega helmingi allra smita á þessu tímabili.

Hvað varðar einkenni smits af völdum XEC, þá hefur engin heilbrigðisstofnun gefið út að einhver ákveðin einkenni tengist afbrigðinu sérstaklega. Eru sjúkdómseinkenni af þess völdum sögð líkjast einkennum af völdum annarra afbrigða veirunnar:

Hár hiti

Stöðugur hósti

Breytingar eða missir lyktar- og/eða bragðskyns

Sjúklingurinn verður andstuttur

Þreyta eða örmögnun

Verkir um allan líkamann

Höfuðverkur

Hálsbólga

Stíflað nef