Á upptökum úr eftirlitsmyndavélum sjást skelfingu lostin börn og lífvana líkami Julio César Pachecos á skólalóð í verkamannahverfi í austurhluta Lima.
Pachecos var skotinn til bana, fyrir framan nemendur sína, af manni sem var dulbúinn sem sendill.
Morðið var framið um hábjartan dag og er sagt vera lýsandi dæmi um það mikla ofbeldi sem herjar á landið en skipulögð glæpasamtök sækja í sig veðrið. Morðið hefur ýtt enn frekar undir umræður um það mikla tjón sem fjárkúganir og ofbeldisverk valda samfélaginu sem heild.
The Guardian segir að morðið á Pacheco sé ekki einangrað tilvik, heldur hluti af stórri glæpaöldu. Allt þetta hefur vakið mikla reiði meðal almennings sem hefur mótmælt víða um land og verkföll hafa verið boðuð. Almenningur sakar ríkisstjórnina um getuleysi við að halda uppi lögum og reglu.
Þeir sem neita að greiða glæpagengjunum verndargjald verða fyrir barðinu á þeim og eiga á hættu að handsprengjum sé kastað að þeim eða þeir jafnvel myrtir. Ná þessar fjárkúganir og ofbeldisverk til allra stétta samfélagsins. Meðal fórnarlamba þeirra hafa verið strætisvagnsstjórar, leigubílstjórar, verslunareigendur, listamenn, hárgreiðslufólk og starfsfólk í eldhúsum.
Í síðustu viku voru 7 morð framin í Lima á innan við 12 klukkustundum og skipti litlu máli að neyðarástandi hefur verið lýst yfir í 14 hverfum borgarinnar.