Að minnsta kosti sjö létust þegar landgangur hrundi í Georgíu í Bandaríkjunum á laugardaginn. Fólk var samankomið á eyjunni Sapelo Island í tilefni af árlegri haustskemmtun þar. Landgangurinn var notaður af ferju sem lagði að bryggju á eyjunni.

Tyler Jones, talsmaður auðlindaráðuneytis ríkisins, skýrði frá þessu í samtali við ABC en það er ráðuneytið sem sér um rekstur ferjunnar sem siglir á milli eyjunnar og fastalandsins.

Margir voru fluttir á sjúkrahús og mikil leit fór fram á slysstað.

Talið er að um tuttugu manns hafi verið á landganginum þegar hann hrundi.

Ekki er vitað hvað olli því að hann hrundi en rannsókn er hafin á tildrögum slyssins.