Undanfarna mánuði hafa farið fram mótmæli, bæði á Tenerife og Gran Canaria, sem beinast gegn ferðamönnum á eyjunum. Vilja sumir meina að ferðamannaiðnaðurinn ýti undir atvinnuleysi og hækki fasteignaverð upp úr öllu valdi. Tugir þúsunda tóku þátt í mótmælum í apríl síðastliðnum og um helgina var aftur mótmælt.
Eins og sést á myndunum í myndbandinu hér að neðan tók talsverður fjöldi fólks þátt í mótmælunum. Á myndum má meðal annars sjá ferðamenn liggja í sólbaði á Troya-ströndinni á Tenerife þar sem þeir eru umkringdir mótmælendum með skilti, trommur og flautur.
„Ströndin er okkar,“ hrópuðu mótmælendur meðal annars. „Ferðamenn, drullið ykkur heim,“ stóð á svo á skilti.
Í umfjöllun Daily Mail kemur fram að ekki séu allir heimamenn sáttir við mótmælin og vilja þeir meina að reiðin ætti ekki að beinast gegn þeim ferðamönnum sem heimsækja eyjarnar.
„Það er skömm að þessu. Við eigum að berjast fyrir meiði gæðum í ferðamannaiðnaðinn en ekki gegn þeim sem koma hingað,“ segir Veronica Quintero sem er búsett á Tenerife.
Annar segir að mótmælendur geti þakkað ferðamannaiðnaðinn fyrir það að lífsgæði eru almennt ágæt á Tenerife. Það sé túristum að þakka að mótmælendur eigi flotta síma og séu í góðum holdum.
Talið er að um 7.000 manns hafi tekið þátt í mótmælunum um helgina.
