Thomas Hoover II, sem er 36 ára, upplifði „verstu martröð allra“ þegar hann vaknaði upp á skurðarborðinu á sjúkrahúsi og voru læknar að búa sig undir að taka hjartað úr honum.

Þetta gerðist í október 2021. Hoover hafði verið fluttur á Baptist Health Richmond sjúkrahúsið í Kentucky í Bandaríkjunum eftir að hafa tekið of stóran skammt af eiturlyfjum.

Metro segir að hann hafi verið úrskurðaður heiladauður en þegar hjúkrunarfræðingar hafi farið með hann inn á skurðstofu, svo læknar gætu rannsakað hversu gott hjarta hans var áður en það væri tekið úr honum, hafi hann skyndilega vaknað til lífsins.

Nyckoletta Martin, fyrrum starfsmaður Kentucky Organ Donor Affiliates (KODA), fór yfir málsgögnin og sagði að Hoover hafi spriklað á skurðarborðinu: „Þetta er versta martröð allra, er það ekki? Að vera á lífi í skurðaðgerð og vita að einhver mun opna þig og fjarlægja líffæri. Það er hryllilegt.“

Natasha Miller, sem starfaði einnig hjá KODA, sagði að Hoover hafi sýnt lífsmark þegar verið var að flytja hann af gjörgæsludeild inn á stofuna þar sem taka átti líffæri úr honum: „Hann hreyfðist, eiginlega spriklaði. Þegar þau fóru þarna yfir, þá sást að tár runnu niður kinnar hans. Hann var greinilega að gráta.“

Miller sagði að það sé enn hræðilegra í þessu máli að starfsmaður KODA krafðist þess að annar læknir yrði fundinn til að taka líffærin úr Hoover. Þessu neitaði talsmaður KODA.

Yfirvöld eru nú að rannsaka málið.