Maðurinn heitir Iwao Hakamata og er 88 ára Japani. Hann var sýknaður af morðunum í síðustu viku eftir að dómstóll komst að þeirri niðurstöðu að hugsanlega hafi lögreglumenn átt við sönnunargögnin á sínum tíma og falsað þau. The Japan Times skýrir frá þessu.
Hakamata, sem var eitt sinn atvinnumaður í hnefaleikum, var dæmdur til dauða 1968 fyrir að hafa myrt yfirmann sinn, eiginkonu hans og tvö börn þeirra en þau voru myrt 1966.
Það var þann 30. júní 1966 sem fólkið fannst myrt á heimili sínu. Öll höfðu þau verið stungin til bana, allt frá 3 upp í 15 stungur. Síðan var kveikt í húsinu. The Japan Times segir að rúmlega 1.000 lögreglumenn hafi unnið að rannsókn málsins.
Fjölskyldufaðirinn var yfirmaður Hakamata í verksmiðjunni þar sem hann vann.
Hann var handtekinn mánuði eftir morðin á grundvelli þess að blóð- og bensínblettir væru á fatnaði hans. En svo undarlega vill til að blettirnir fundust samt ekki fyrr en 14 mánuðum eftir morðin. Þeir voru á fatnaði sem talið var að morðinginn hefði klæðst. Þessi fatnaður var mikilvægasta sönnunargagn lögreglunnar.
En það er einmitt þessi fatnaður sem dómstólinn telur að lögreglumenn hafi átt við og í raun „búið til“.
Hakamata var ítrekað yfirheyrður klukkustundum saman af lögreglunni 1966. Yfirheyrslurnar reyndu mjög á hann og að lokum játaði hann morðin. Þegar málið var tekið fyrir dóm, dró hann játninguna til baka og sagði að lögreglumenn hefðu sparkað í hann og lamið á meðan á yfirheyrslunum stóð.
Hakamata er nú frjáls maður og búið að hreinsa hann af öllum grun, að minnsta kosti að sinni því saksóknari hefur tvær vikur til að ákveða hvort dómnum verður áfrýjað.
The Japan Times segir að 500 manns hafi mætt í dómsuppkvaðninguna í von um að fá eitthvað af þeim 40 sætum sem eru í dómsalnum. Hakamata var ekki viðstaddur því heilsa hans leyfði það ekki.
